LAOAG CITY – Positibo ti naiyuswat ti search operation iti Barangay 4, Marcos iti ili ti Banna partikular iti pagtaengan ti maysa a negosyante, babaen iti kameng ti Philippine National Police iti nasao nga ili, Regional Drug Enforcement Unit ken ti Provincial Intelligence Unit.
Nabigbig ti subject ti operasyon a ni Mr. Joseph Taroma alyas Bruce Taroma, maysa a negosyante ken residente iti nadakamat a barangay
Ti search warrant ket inparuk-at ti regional Trial Court Branch 14 gapo iti panaglabsing iti Republic Act 9165 wenno panagikot iti iligal a droga.
Naala dagiti otoridad iti kusina iti pagtaengan ni Taroma ti maysa a caliber 357 nga addaan ti tallo a bala ken dua a sachet iti maatap a shabu.
Mainaig iti daytoy, inpetteng ni Taroma nga awan ti ammo na mainaig iti paltog a naala iti pagtaengan na ken no pudno a kukua na daytoy ket saan na a mabalin nga idisso iti sadinno man a paset ti balay da nangruna ket adda ti babbarito nga annak na.
Inlawlawag na a ti naglabasan na iti baro pay laeng ti saan na a kayat nga ipakita kadagiti annak da.
Segun pay kenni Taroma, no pudno nga adda ti aramid na a ket namonitor kuma isuna a naimbag tapno mapaneknekan no adda ti madi nga aktibidad na wenno saan.
Saan met nga ammo ni Taroma no anya ti rason no apay a naiyuswatan ti operasyon ngem mabalin nga apal daytoy gapo ta makita a nasayaat ti pagsapulan da wenno ti negosyo da.
Inpetteng na a no adda ti pudno nga aramid na ket sumuko tapno saan a kastoy ti mapasamak ngem adda ti dimmanon kenkuana a bayat a matmaturog pay laeng itay bigat ket maipagarop nga adda ti dua nga indibidual nga ummuna a simrek ken nakaabungot dagitoy.
Inpalgak na a baro pay laeng idi naudi a nagusar iti iligal a droga ken tawen 2019 idi adda idiay Manila ngem nabalakadan nga agawid babaen kadagiti nagannak kenkuana gapo ta ti dumanondanon ket maipagarop a mapaltogan iti langalang no saan a sumuko ditoy probinsya.
Kunana nga adda ti panagkedked na idi a sumuko gapo ta patien na nga awan ti aramid na nga iligal ngem gapo iti panagbuteng na iti maipagarop a mapaltogan ket nagawid ditoy probinsya ken simmuko.
Kabayatanna, inbatad ni Barangay Captain Glen Tejada a saan na a ninamnama daytoy a pasamak nangruna ket naideklara ti barangay da kas Drug-free barangay ken awan met ti manonmonitor da iti uneg ti masakupan na.
Inbatad na a sipud nagtugaw kas kapitan idi 2018 ket awan met ti madi a rekord ni Taroma iti uneg ti barangay da.
