LAOAG CITY – Manarimaan ti imbestigasyon ti Lokal a gobierno iti ili ti Vintar ken ti Philippine National Police seknan iti report nga adda dagiti sumagmamano nga empleado iti Agriculture Office a maipagarop nga agilaklako ti feeds a ginatang ti gobierno lokal.
Daytoy ti inbutaktak ni Mayor Richard Degala iti ili ti Vintar.
Kalikagom ni Mayor Degala a maduktalan no siasinno ti adda iti likudan iti pannakailako dagiti feeds a ginatang ti gobierno lokal a para kadagiti mannalon iti nasao nga ili.
Inpakaammo ti mayor nga addan ti palawag Doctor Myrna Simon, ti Municipal Agriculturist seknan iti daytoy a pasamak.
Nupay kasta, kuna ni Degala nga intono bigat paylaeng a makaipaay ti naan-anay a komento na iti daytoy nga isyu.
Kabayatanna, inlawlawag ni Police Capt. Roy Manuel Ordonio, ti chief of police iti ili ti Vintar nga adda dagiti nakumpiskar da a feeds a bunbunagen dagiti sumagmamano nga empleado ti Agriculture Office a maipagarop nga ikabil koman dagiti maseknan iti suppliers iti nasao nga ili.
Nagballaag ni Ordonio a no mapaneknekan a nagbasol dagiti sumagmamano nga empleado iti Agriculture Office ket malaksid iti sangwen da a kaso administrado ket mapilaan da pay ti reklamo a qualified theft.
