Lalaki a sumangsango iti kaso a panaglabsing iti New Anti Carnapping Act of 2016, natiliw iti ili ti Piddig

LAOAG CITY – Balligi a naarestar ti maysa a lalaki iti ili ti Piddig.

Segun kenni Police Captain Rudy James Jacalne, Hepe ti Philippine National Police iti nasao nga ili, nabigbig ti suspek agtawen ti 21, awanan ti asawa ken residente ti Brgy. 19, Abucay iti ili ti Piddig.

Inbatadna a basar iti naisayangkat nga imbestigasion, nagturongda iti Sta. Ignacia Police Station iti Tarlac Police Provincial Office tapno tiliwen ti maibilang a wanted person gapu iti panaglabsingna iti RA 10883 wenno New Anti Carnapping Act of 2016.

Inlawlawagna a naarestar ti suspek babaen iti naiparuk-at a warrant of arrest idi Hunio 14 iti agdama a tawen nga inyisyu ni Honorable Francis William Matampale Espeniola, Presiding Judge iti Regional Trial Court ti 3^rd Judicial Region ti Branch 112 iti Camiling, Tarlac.

Kunana a narekomendaran ti suspek ti 300 a ribu a pisos para iti temporario a pannakawayawayana.

Innayonna a ti akusado ket mai-turn over iti Korte a naggapoan ti warrant of arrest para iti naan-anay a disposision daytoy.