LAOAG CITY – Balligi a natiliw ti maysa a maibilang a bigtime drug pusher babaen iti naisayangkat a drug buy-bust operation iti Barangay Buttong ditoy ciudad ti Laoag.
Nabigbig daytoy a ni Alexander Guarino, adda iti lega nga edad, naasawaan, residente iti Brgy. Araniw ditoy ciudad ti Laoag nga agab-abang ti boarding house iti Brgy. Buttong.
Inarestar dagiti otoridad ti Guarino kalpasan a naaktoan a naglako ti dua a sachet ti maipagarop a shabu iti poseur-buyer.
Malaksid iti daytoy, naala pay iti ikot na ti tallo a sachet iti maipagarop met laeng a shabu, dua a cellphone, nagduduma a drug pharapernalia, maysa a genuine 1,000 peso bill ken lima a pidaso ti 1,000 fake money a nausar kas buybust money.
Amin a nakumpiskar a maipagarop a shabu ket agdagsen ti sumurok-kumurang a 15 a gramo ken agbalor ti 102,000 a pisos.
Rumrumuar a ni Guarino ti mapmapan mangala ti iligal a droga idiay Manila ken isu ti maipagarop nga agilako ditoy probinsya,
Maibilang pay daytoy nga High Value Individual iti Philippine Drug Enforcement Agency (PDEA).
