LAOAG CITY – Patien ni Dr. Diophantos Acob, ti Municipal Health Officer iti ili ti Pasuquin nga awan ti liway da iti napasamak iti maysa a Sabado nga adda ti baket a naka-wheelchair nga adda iti sangwanan ti Rural Health Unit.
Segun kenni Acob, iti tunggal Sabado ket awan ti duty a paramedics iti alas-otso ti bigat agingga iti alas-otso iti rabii gapo ta arig na overworked dagitoy.
Malaksid iti daytoy, kuna ti doktor nga iti Sabado ket naka-schedule nga alaen ti Philippine National Police ti maseknan ngem rumrumuar nga iti dayta a gundaway ket saan na a kayat ti simmurot.
Inpetteng na a nupay kuma saan a kinayat ti baket ti simmurot iti pulisya ket napilit kuma latta daytoy, gapo ta idi kalman, Hulyo 5 ket saan na met a kayat ti agpataming ngem napilit da daytoy.
Naamoan a basar iti diagnosis ket bipolar ti nasao a baket wenno adda ti mental disorder na.
Mainaig iti daytoy, kuna ni Acob a saan da nga ammo no siasinno ti baket ngem itay laeng kallabes ket rumrumuar a nakita daytoy iti asideg ti plaza iti ili ti Dingras, ken naipakaammo iti Rural Health Unit iti nasao nga ili ngem indeny daytoy nga aggapo iti Dingras ti maseknan.
Naduktalan pay nga adda ti taga-Cagayan a nangilugan iti nasao a baket ken indisaag na iti ili ti Pasuquin, ken adda dagiti lemma iti bagbagi na, ken iti agdama ket agtultuloy ti pannakataming daytoy.
Gapo iti daytoy, patien ni Acob a pamerperdi laeng ti panagreport ti concern citizen iti nasao nga ili nangruna ket saan a makapagna ti baket ken saan na a kabaelan nga iduron ti wheelchair na.
Iti met biang ti Municipal Social Welfare and Development Office (MSWDO) iti nasao nga ili, naiyendorso dan iti Philippine National Police daytoy ken naurnos da ti pagtalinaedan ti baket iti Sabado.
Inpalgak na nga awan met ti shelter ti ili ti Pasuquin rason nga iti Philippine National Police ti napanunot da a pakaipanan iti Sabado.
Innayon pay ti pannakabagi ti Municipal Social Welfare and Development Office a manarimaan met ti pannakakikoordenar da kadagiti shelter nga isu ti pakaiyakaran ti baket.
Kabayatanna, immapela ni Dr. Acob ken Municipal Social Welfare and Development Office kadagiti makam-ammo ken kapamilya ti baket a mapan da alaen ti maseknan.
