LAOAG CITY – Positibo ti naiyuswar a search operation iti Sitio 3, Barangay Calayab ditoy ciudad ti Laoag babaen kadagiti kameng ti Philippine National Police.
Nabigbig ti subject ti operasyon a ni Mr. Ronnie Rebollido, agtawen ti 50 ken residente iti nasao a barangay.
Nailanad iti search warrant nga inparuk-at ti RTC Branch 16 ditoy ciudad ti Laoag a ti biruken dagiti otoridad ket maysa a kalbre 38 a paltog, maysa a kalibre 45 a paltog ken balbala.
Naala met iti kwarto iti pagtaengan ni Rebollido ti maysa a paltog ken balbala.
Mainaig iti daytoy, inpetteng ni Rebollido a saan a nasurot ti umno a proseso ken saan a makatao ti pannakaiyuswat ti operasyon.
Daytoy ket gapo ta maipagarop nga adda ti lallaki a nakasibilyan ti simrek iti pagtaengan da ken riniing da daytoy ken induron a rimuar ken binagaan na pay dagitoy a saan da a sumsumrek.
Nupay kasta, rumrumuar a saan a dimngeg dagiti simrek ken nagtalinaed da iti uneg ken maipapagrop a binangon da ti asawa na agingga a nakarwar da amin.
Dinakamat na nga adda ti nangeg ti maysa kadagiti annak na nga adda ti nasinnarita no sadinno ti insawang dagitoy ket “Awan taon?” ken “Awanen, nakarwar da aminen”.
Inpalgak ni Rebollido a nawaya a nakastrek dagitoy gapo ta awan ti lock dagiti ridaw da uray dagiti kwarto da.
Ummuna iti daytoy, inadmitir ni Rebollido dua agingga iti tallo a lawas ti napalabasen idi adda ti kinomprontar na ti maysa nga indibidual a nangibaga nga agtatakaw ti taga-Calayab ken naskit ti rikna na iti daytoy gapo ta saan met a pudno.
Kunana a kalpasan daytoy ket adda ti reklamo kenkuana nga adda ti maipagarop a tinutukan na ti paltog, ken iti dayta a gundaway ket adda ti nagturong iti pagtaengan da a pulis ken ditoy nga inbaga na kadagiti maseknan a nawaya da a sumrek iti pagtengan da wenno mangala da ti search warrant iti dayta a gundaway tapno makita da ken malawlawagan nga awan ti ik-ikotan na a paltog.
Innayon na a nga ipa-Diyos na laengen ti nagresultaan ti operasyon ken mangnamnama a makonsensya ti indibidual a patien na a nangimula kadagiti naala iti pagtaengan da.
