LAOAG CITY – Balligi ti naiyuswat a drug buy-bust operation a nakatiliwan dagiti aglive-in partner iti Barangay 16, San Marcos iti ili ti San Nicolas.
Nabigbig dagiti natiliw nga isuda Ronaldo Antonio, agtawen ti 54, tubo iti San Ildefonso, Bulacan; ken ni Merry Ann Bingoy, agtawen ti 28, tubo met iti Tondo, Manila, ken agpada nga agnanaed iti boarding house iti Barangay San Marcos.
Natiliw dagiti dua kalpasan ti panaglako da ti maysa a medium-size heat-sealed transparent plastic sachet a naglaon ti maipagarop a shabu iti police poseur buyer.
Narekobre pay iti ikot ni Antonio ti 30,000 a pisos kas buybust money a buklen ti maysa a genuine 1,000 peso bill ken ti twenty-nine pieces a fake 1,000 peso bill; uppat a medium-size sachet; maysa a brown paper; maysa a black pouch ken dua a cellphone.
Amin a narekobre a drug items ket agdagsen ti nasurok kumurang 20 a gramo ken agbalor ti 136,000 a pisos.
Kabayatanna, inbatad ni Barangay Chairman Federico Simpliciano nga agarop dua a bulan pay laeng nga agkaskasera iti barangay da dagiti aglive-in partner.
Segun kenni Simpliciano, iti pay nalapabas a lawas nga imonmonitor da dagiti dua kalpasan a naipadanon met kadakuada nga adda ti maipagarop nga iligal nga aktibidad da.
Kunana nga agsubli-subli iti Metro Manila ti nadakamat a natiliw.
Immapela met ti kapitan kadagiti kabarangayan nga agtitinnulong da tapno awan ti maperdi a masakbayan dagiti kabarangayan da gapo iti iligal a droga.
Iti agdama, dagiti aglive-in partner ket adda iti kustudiyar ti Philippine National Police iti ili ti San Nicolas ken sumango iti kaso a panaglabsing iti Secion 5 ken Section 11 iti Republic Act 9165.
