LAOAG CITY – Dismayado ni Congresswoman France Castro, Alliance of Concerned Teachers Party-List Representative iti maikadua nga State of the Nation Address ni Presidente Ferdinand Bongbong Marcos Jr. kalpasan a saan a naikkan ti naan-anay nga importansia ti kalikagum a pannakaipangato ti sueldo dagiti mangmangged, agpapaay iti gobierno ken dagiti mangisursuro.
Inbatadna a daytoy koma ti maysa kadagiti naipangpangruna a naipadanon para kadagiti maseknan a Pilipino nangruna ket saan nga umdas ti nainayon a sueldo iti National Capital Region ken dadduma a rehion ditoy pagilian.
Inpalgakna nga arig band aid solution laeng ti naisayangkat a Kadiwa Store kadagiti nagduduma a paset ditoy pagilian gapu ta saan met amin a konsyumer ket naiyasideg kadakuada ti nasao a programa.
Inlawlawagna a saan pay a dinakamat ni Presidente Marcos ti panangipasardengna iti panagabuso iti human rights gapu ta mamati daytoy nga agtultuloy pay laeng ti human rights violations kas ti harassment, coercion ken dadduma pay.
Kunana a saan a narikna ti 7.6 growth rate ti ekonomiya ti pagilian kalpasan nga adu latta dagiti makapaspasar iti panagrigat iti panagbiag gapu iti nangina a magatgatang.
Mangnamnama ni Congresswoman Castro a maipaayen ti COVID-19 allowance dagiti healthcare workers kangrunaanna kadagiti agpapaay iti pribado nga ospital iti kabiitan a panawen gapu ta nabayagen nga iyur-uray dagiti maseknan a frontliners.
Saan pay daytoy a napnek ti dinakamat ti Presidente mainaig iti benneg ti edukasion gapu ta mamati a ti dua a tawen a nainayon iti K to 12 program ket nayon laeng a padagsen para kadagiti nagannak dagiti estudiante.
Innayonna a saanna pay a marikna ti makunkuna a “Bagong Pilipinas” nga isu ti slogan ken branding ni Presidente Marcos gapu iti agtultuloy a kapada a patakaran a maipatpatungpal.
Kabayatanna, inikkan ni Congresswoman Castro ti bagsak a grado ti maikadua nga State of the Nation Address ni Presidente Marcos.
