LAOAG CITY – Naideklarar ti state of emergency iti Ecuador kalpasan ti pannakapapatay ti maysa a Presidential candidate kabayatan ti ipapanaw na iti maysa a campaign rally iti kabisera ti Quito.
Agpaot ti 60 nga aldaw ti indeklarar nga state of emergency ni Outgoing Ecuadorian President Guillermo Lasso iti intero a pagilyan kas aksyon na iti pannakapapatay ti agtawen ti 59 a Presidential candidate a ni Fernando Villavicencio.
Iti nagbalin nga address ti presidente iti Ecuador, inbatad na a pinagtignay nan ti armed forces iti sibubukel a pagilyan tapno masigurado ti seguridad dagiti umili, kinaurnus ti pagilyan ken para iti nawaya ken demokratiko nga eleksyon intono Agosto 20 ita a tawen.
Basar iti maysa a video footage, makita nga aglugan koman ti Presidential candidate idi pinaltugan iti namintallo a daras ti ulo na ti suspek.
Pimmusay metlaeng ti maysa kadagiti suspek iti krimen kalpasan a nagsagaba ti nakana a sugat iti shootout.
