LAOAG CITY – Kinumpirmaran ni Barangay Chairman Elviro Agoo iti Barangay Davila iti ili ti Pasuquin a nabirukan a sibibiag ti mangngalap a kalugaran da a nagpukaw idi kangitingitan ti iduduprak ti bagyo Egay.
Maipalagip a sakbay a nagdisso ti bagyo Egay ket simmalog iti baybay ni Alvin Plasos kadwa na dagiti dua pay a pada na a mangngalap.
Nupay kasta, naamoan a nakisina ni Plasos ken sipud idi ket saanen a nakaawid pay.
Inpakaammo ni Kapitan Agoo nga adda dagiti mangngalap a nakakita kenni Plasos iti Dalupiri Island, maysa nga isla iti Babuyan Islands.
Inbatad ni Agoo a saan pay a naan-anay a makaipaay ti detalye no kasanu a nakadanun ken nakalasat ni Plasos iti nasurok a makalawas a panagtalinaed na iti taaw.
Immunan a nakita ti nagluganan a bangka ni Plasos iti baybay a sakop ti Calayan Islands.
Iti agdama, kuna ni Agoo nga adda iti kustodyar ti Philippine Coastguard (PCG) ni Plasos ken manamnama nga apaman a sumayaat ti sitwasyon ti baybay ket maitulnog danton iti ili ti Pasuquin.
