LAOAG CITY – Manamnama a sakbay nga agngudo iti daytoy a lawas ket mabigbig ton ti 90 a porsiento dagiti nauram a tattao gapu iti napasamak a wildfire iti Lahaina Maui, Hawaii.
Daytoy ti report ni Bombo International News Correspondent Manny Pascua iti Hawaii.
Segun ken ni Pascua, rumigrigat ti sitwasyon iti lugar gapu ta malaksid iti madi nga angot ket nakontaminaran payen ti danom iti baybay gapu kadagiti banag a naikabil gubuay ti napasamak a wildfire.
Inpakaammo ni Pascua nga inkari ni Governor Josh Green a mangipaay da ti housing program para kadagiti nadidigraan iti nasao nga isla.
Kuna na nga umawat ti kada residente iti 700 a dolyar manipod iti federal government ngem masapol nga agaplikar dagiti maseknan gapu ta adda ti masurot a proseso.
Kabayatanna, kinumpirmaran ni Pascua nga addan dagiti nabigbig na a Pilipino a nagpukaw idi kangitingitan ti wildfire no sadinno nga agpapan ita ket saan pay a nasarakan.
karaman ditoy ni Mr. Rodolfo Rucotan iti Barangay Quiling iti ciudad ti Batac nga agtrabtrabaho iti landscaping company iti Lahaina Maui.
Basar iti manugang ni Rucotan a ni Sinamar Paulino, naudi a nakasarita da ti katugangan na idi aldaw ti martes, Agosto 9 no sadinno nga indanun na kadakuada a naidumduma ti kinapigsa ti angin iti lugar isut gapuna a pinagsardeng da dagitoy nga agtrabaho.
malaksid ken ni Racuno ket mapukpukaw pay da Mr. and Mrs. Joel Villegas, ti anak da a ni Angelica ken Joemar Villegas, agpapada dagitoy a taga Baracbac, Sinait, Ilocos Sur.
Naamoan a ni Kevin Baclig nga asawa ni Angelica ket awan iti balay da idi napasamak ti wildfire gapu ta adda iti trabaho na kas nurse iti cental Maui isut gapuna a naiyadayo iti didigra.
