LAOAG CITY – Dagus a pimmusay ti driver ti tricycle kalpasan a dinungpar ti maysa a Delivery close van iti paset ti Brgy. 32 Cororcor, Bacarra, Ilocos Norte.
Nabigbig ti biktima a ni Edvin de Leon, agtawen ti 26 ken residente iti Brgy. 31 Calioet-Libong iti nadakamat met laeng nga ili idinto a ti driver ti close van ket saan pay a nabigbig gapo ta dagus met a naglibas.
Iti imbestigasyon dagiti kameng ti Philippine National Police iti ili ti Bacarra, agpabagatan ti biktima iti nadakamat a barangay idi kellaat a dinungpar ti close van nga adda iti likod na.
Gapo iti daytoy, nagsagaba ti driver ti tricycle ti sugat iti nagduduma a paset ti bagi na kangrunaan iti ulo na indeklara ni Dr. Lester Acosta Sigabo a dead on the spot. Kabayatanna, agtultuloy pay laeng ti iyus-uswat da a manhunt operation tapno mabirukan ti driver ti close van a naglibas kalpasan ti insidente.
