LAOAG CITY – Nagkiddaw ni Vice Mayor Jonathan De Lara kadagiti dua nga operators iti Solsona nga ipabulod dagiti equipment-da a mausar kabayatan iti iduduprak ti Supertyphoon Goring.
Segun kenkuana, babaen iti daytoy ket adda dagiti mausar nga equipment para iti al-alisto a pananglapped ti layos iti lugarda nangruna ket manarimaan ti isaysayangkatda a sand bagging iti abagatan a paset ti karayan iti ili ti Solsona.
Inbatadna a masapol ti nayon a heavy equipment tapno saan unay a marigatan ti pay loader nga isu ti masansan a maus-usar tii agdama iti ilida.
Inlawlawagna a dagiti sumagmamano nga equipment ti munisipyo ket adda iti Brgy. Nalasin ken Brgy. Sta. Ana a maus-usar tapno para sand bagging a manglapped ti panaglayos kadagiti nasao a barangay.
Kunana nga adda dagiti naibunong a relief packs para kadagiti residente ti Brgy. Nalasin gapu iti pannakapasar dagitoy ti layos.
Inpalgakna nga inmandarna ti Kapitan ti Brgy. Manalpac a gutiguten dagiti residente ti nadakamat a barangay kangrunaanna iti Sitio Serrek a mapan kadagiti evacuation centers wenno dagiti kabagianda a mabalin a temporario a pagtarusanda bayat iti epekto ti Bagyo Goring.
Mainaig iti daytoy, kuna ni Vice Mayor De Lara nga idi kalman ket naiget ti panangmonitorda kadagiti amin a barangay iti ili ti Solsona tapno maipasigurado ti kinatalged dagiti umili no sadino kaduana da Mayor Joseph De Lara, sumagmamano a Sannguniang Bayan Members, ti Hepe ti Philippine National Police iti nasao nga ili a ni Police Captain Randy Damo pakairamanan dagiti kameng ti Bureau of Fire Protection.
Kabayatanna, nagpanawagan ti Bise Mayor kadagiti umili iti ili ti Solsona nga agbalin a naridam ken agtulnog kadagiti otoridad nangruna no kasapulanen ti pannakaibakwit dagitoy tapno maliklikan ti saan a napintas a pasamak.
