LAOAG CITY – Kinumpirmaran ni Vice Mayor Jonathan de Lara iti ili ti Solsona nga agpapan ita ket agtalinaed nga isolated iti Barangay Nalasin ken Barangay Lipay kalpasan ti iduduprak ti bagyo Goring.
Segun iti bise mayor, inaramid da amin a wagas tapno makadanun da koma laeng kadagiti dua a barangay ngem saan da a nagballaigi gapu iti kinaapres ken kinadakkel ti danom iti karayan nga isu laeng ti mabalin da a pagnaan.
Gapu iti daytoy, kuna ni de Lara a nagkiddaw da ti tulong dagiti kameng ti Special Action Force no sadinno a manamnama nga agturong da iti ili ti Solsona ita nga aldaw.
Kabayatanna, inpakaammo ni Vice Mayor de Lara nga adda ti maysa a lalaki a nalakun iti ballasiw karayan a ballaigi a narescue da kadagiti kameng ti Philippine National Police ken ti Municipal Disaster Risk Reduction and Management Council.
Inlawlawag ni de Lara a basar iti uliteg ti lalaki ket nagsubli ti maseknan iti ballasiw karayan apaman a nages-es ti danom tapno ituloy na a bunagen dagiti kayo nga ur-uringen na ngem bigla a nagtudo ti napigsa rason a saanna a kinabaelan ti nakasubli iti balayda.
Innayon na a tapno adda ti ipauneg na kabayatan ti kaadda na iti ballasiw ti karayan ket inbakalan da ti kanen na kas ti biscuit ken de lata.
