LAOAG CITY – Natay ti maysa a senior citizen iti Sitio Canait, Barangay Tarrag iti ili ti Pagudpud kalpasan a maipagarop a nalmes iti irrigation canal.
Nabigbig ti biktima a ni Euserbio Talaro, agtawen ti 63, ken residente metlaeng iti nadakamat a barangay.
Basar iti imbestigasyon dagiti kameng ti Philippine National Police iti ili ti Pagudpud, naggiinom da Talaro ken sumagmamano a karruba na iti mismo a balay ti biktima.
Rumrumuar nga apaman a nalpas a naggiinom dagiti maseknan ket umallatiw koma ti biktima iti annex ti balay na ngem maipagarop a natennag iti kanal.
Nakita laengen ti bangkay ti biktima iti kabigatan na no sadinno nga iti panangeksamen ni Doctor Krisha Ma. Veronica ket kinumpirmaran na a natay ni Talaro gapu iti pannakalmes na.
Naamoan a masansan nga aginom ti arak ti biktima ken kalpasan iti daytoy ket ugali na ti umallatiw iti annex ti balay da no sadinno nga adda ti kanal a pagnaan na.
Awan ti nakita a foul play dagiti kameng ti pulisya iti pannakatay ti biktima.
