LAOAG CITY – Manarimaanen ti pannakaipila ti kaso iti suspek iti insidente ti hacking iti siudad ti Batac.
Daytoy ti inbatad ni PLTCOL Jerome B. Wangkey, hepe ti Batac City Police Station.
Segun kenkuana a sangoen ti suspek ti kaso mainaig iti frustrated murder ken iti panaglabsing ti RA 10591 wenno ti Comprehensive Firearms and Ammunition Regulation Act.
Nupay kasta, saanna pay a maipasigurado no adda wenno awan iti mairekomendar a piansa ti suspek para ti temporario a pannakawaya-wayana.
Kabayatanna, saan met a nasagaba ti nakaro a sugat iti ulo ti biktima ket nakaruar metten daytoy manipud ti ospital.
Maipalagip a maysa nga hacking incident ti napasamak iti siudad ti Batac a pakaseknan ti dua a lalaki.
Nabigbig ti biktima a ni Eric Gaoat Manglal-lan, agtawen ti 48, naasawaan, electrical technician ken residente ti Brgy. Bil-loca, iti nadakamat a siudad. Kabayatan a ti suspek ket nabigbig a ni Leonardo Bello Bayangos, agtawen 71, awanan asawa, awanan trabaho ken residente ti Brgy Bungon, iti metlang a siudad.
Basar ti imbistigasion, sakbay ti insidente, agsangsango nga agin-inom dagiti dua a maseknan iti pagtaengan ti suspek no sadinno kaduada dagiti dadduma pay nga indibidual.
Naamoan nga aginna-angaw dagitoy agingga a kinagura ti suspek ti nagbalin a rakurak ti biktima.
Kalpasan iti daytoy, inarayat ti maysa a kaduada nga agiinom iti biktima nga agararubos ti darana nga nagturong iti Brgy. Hall iti Brgy. Bungon ket ditoy nga naamoan a tinagbat ti suspek ti biktima.
Insigida a naitaray daytoy iti Mariano Marcos Memorial Hospital and Medical Center iti siudad.
Kabayatanna, nagturong dagiti kapulisan, kabinnulig dagiti kagawad ken chief tanod ti barangay, iti pagtaengan ti suspek ken insigida a nabigbig ti suspek ken inarestar.
Narekobre manipud iti suspek iti maysa a bolo.
Malaksid iti daytoy, nakumpiskar pay ti maysa a magnum revolver, maysa a live ammunition iti cal.45, maysa a sling bag ken 27 a pidaso ti live ammunition iti cal. 22.
