LAOAG CITY – Inlawlawag ni Atty. Gerald Gallardo, ti Provincial Director ti Department of Interior and Local Government ditoy probinsya no kasanu ti panagpili da kadagiti nainominar para iti Search for Outstanding Sang Panglungsod/Bayan Members of Region 1 2023.
Inbatad na a dagiti nainominar manipod ditoy probinsya ket isuda Konsehal Handy Lao ditoy ciudad ti Laoag, Vice Mayor Jonathan de Lara iti ili ti Solsona ken ni Sang bayan member Florencio Sales Jr. iti ili ti Bangui.
Segun ken ni Gallardo, adda dagiti nagibasaran dagiti miembro ti Provincial Awards Committee iti panagpili da kadagiti nominees.
Karaman ditoy ket ti effectiveness ken efficiency dagiti tallo nga opisyal no sadinno a kinita da ti bilang dagiti resolusyon ken ordinances nga inpila da kabayatan ti termino da, ken no mano ti naipasa.
Malaksid iti daytoy, kinita pay dagiti miembro ti Provincial Awards Committee no dagiti naipasa a resolusyon wenno ordinansa dagiti nasao nga opisyal ket epektibo ken dakkel ti maitulong na iti umili ken iti masakupan da a lugar.
Inpakaammo pay ni Gallardo nga uray ti attendance ken punctuality dagiti maseknan ket nakita amin tapno matingiting no kasanu ti kinaaktibo dagitoy a makipagpaset iti session ken iti mismo a trabaho da.
Kuna na nga uray dagiti panagatendar dagiti maseknan nga opisyal kadagiti meetings, seminars ken dadduma nga aktibidad ket karaman a nagibasaran iti panagpili da kadagiti nominees.
Innayon na a karaman pay a nagibasaran da iti integrity ken accountability tapno maamoan no dagiti maseknan ket awan ti administrative ken criminal charges a naipila kontra kadakuada.
Kabayatanna, inpakaammo ni Gallardo nga adda ti nagtutulagan da iti Provincial Philippine Councilors League ken Vice Mayor’s League nga adda ti maited a pammbigbig kadagiti provincial nominees, ngem saanna pay a naibaga no kaanu ken no sadinno ti venue para iti daytoy.
