LAOAG CITY – Nauram iti tallo a balay iti Barangay 10 iti ili ti Bacarra.
Segun kenni Mrs. Caridad Flores Maligsay, maysa kadagiti nauraman ti balay, agarup alas 2 idi malem kabayatan nga agid-idda iti sango ti pagtaengan na ket nakangngeg ti ringgor manipod kadagiti karruba na.
Gapu iti daytoy, bimmangon ken idi napan na kinita ti ayan dagiti agririnnggor ket nakita na a dakkelen ti apoy iti likudan ti pagtaengan da.
Kuna na a ginandat na ti sumrek iti balayda tapno mapan mangsalbar kadagiti kagamitan da ngem saanna a kinabaelan gapu iti kinabara ti apoy.
Inlawlawag na nga iti oras ti alas-diyes ti bigat ket nagluto ti bagas ken kalpasan iti daytoy ket sinebseban na ti kayo a pinagluto na ken inyabay na kadagiti kayo.
Patien ni Maligsay a saan na a nasebseban a naimbag ti kayo ken daytoy ti possible a namonganayan ti apoy.
Kabayatanna, inpalgak ti anak ni Maligsay a ni Mercy Pamitan nga awan da iti asawa ken dagiti annak da iti balayda idi napasamak ti uram.
Kunana nga iti akin amyanan ket isu ti pagtaengan da, ti makintengga ket iti family house da ken iti abagatan ket balay iti kasinsin na.
Inpakaammo ni Pamitan a karaman kadagiti nauram ket ti refrigerator da, washing machine, electric fan, ken ti cash a 150,000 a pisos a nakaikabil iti cabinet da ken 10,000 a pisos nga adda iti pitaka ti asawa na.
Kuna na a ti 150 ribo a pisos ket naglakoan da ti baboy iti kallabes.
Mainaig iti daytoy, inpalgak ni Fire Inspector Neil Winston Navalta, ti acting municipal fire marshall iti ili ti Bacarra nga agtultuloy pay laeng iti imbestigasyon da tapno maamoan no ania ti nangrugyan ti uran.
Inpalgak na nga alisto a nagramram ti apoy gapu ta naaramid kadagiti light materials ti akin-tengga a balay wenno ti family house da.
Karaman kadagiti napan timmulong a nangsebseb iti apoy ket dagiti kameng ti Bureau of Fire Protections iti ili ti Vintar ken ken Bureau of Fire Protection ditoy ciudad ti Laoag.
