LAOAG CITY – Positibo ti naisayangkat a search operation iti pagtaengan ti maysa a Barangay Kagawad iti Barangay 4 ditoy ciudad ti Laoag.
Nabigbig daytoy a ni Barangay Kagawad Wendel Tamayo ken kandidato daytoy a para-Kapitan iti Barangay ken Sang. Kabataan Electios.
Ti nasao nga operasyon ket inyuswat ti nagtipon a pwersa ti Philippine National Police ditoy ciudad ti Laoag, Provincial Drug Enforcement Unit ken Provincial Drug Enforcement Agency.
Naala iti pagtaengan ni Tamayo partikular iti cabinet nga adda iti ridaw da ti 10 a sachet ti maipagarop a shabu, maysa a glass tube tooter a naipan iti balay ti antyukos daytoy, maysa a a bassit a supot a maipagarop a naglaon ti napagango a bulong ti marijuana.
Mainaig iti daytoy, inpetteng ni Tamayo a saan a nasurot ti umno a proseso iti operasyon gapo ta idi naparwar dagitoy ket maipagarop nga adda ti nabati a kameng ti pulisya iti nakalaan ti maatap nga iligal a droga.
Inbatad na a naibaga pay kenkuana a maipagarop a natutukan ti paltog ti menor de edad nga anak na no sadinno mabalin nga iti panangparwar da kadakuada ken naitutok ti pulis ti paltog na.
Kunana a rimuar da iti paset ti kusina da ngem idi adda dan iti sango ti balay da ket maipagarop nga adda pay laeng ti pulis iti uneg ti pagtaengan na ken atapen na a ditoy ti maipagarop a panangimula dagitoy iti iligal a droga.
Segun kenni Tamayo, saan na nga am-ammo dagiti pulis ngem adda ti nabigbig na ken innaganan na ti “Sir Ganir” a karama kadagiti nangiyuswat ti operasyon.
Inpalgak na nga awan pulos ti pakainaigan na iti iligal a droga ken patien na a rumuar to met laeng ti pudno nangruna ket dakkel ti epekto daytoy iti pamilya ken ti panagpaidasig na iti eleksyon.
Kabayatanna, inbatad ni Mr. Alex Campos, ti katugangan ni Tamayo nga awan met ti ammo na a madi nga aramid ti manugang na nangruna ket isuna a mismo pay ti ummuna nga aggaraw no adda ti kasapulan ti bumarangay.
Inpetteng na a ti nakakaskasdaaw piti daytoy ken no pudno nga agus-usar ti manugang na iti iligal a droga ket apay nga iti asideg ti arwangan ti pangidulinan na ket masansan nga isu ti luklukatan dagiti annak ti maseknan nga agtawen ti tallo ken lima.
Atapen ni Campos nga adda ti pakainagan na iti eleksyon ti pannakaiyuswat ti eleksyon. Innayon na a nakababain daytoy para iti pamilya da nangruna ket awan met ti nakaidamdamagan a madi ti pamilya da.
