LAOAG CITY – Naarestar dagiti dua nga indibidual gapo iti panagsusugal da iti maysa a minatayan iti ili ti Solsona.
Segun ken Pol. Cap. Randy Damo, hepe ti Philippine National Police ti ili ti Solsona, nakawat da ti report nga adda ti agsususgal iti Sitio 1 iti Barangay Lipay ti nasao nga ili.
Gapo iti daytoy, dagus a nangiyuswat dagiti kameng ti pulisya ti anti-illegal gambling operation no sadinno a ballaigi a naarestar ti agtawen 30, awanan asawa ken residente ti barangay Laureta, Solsona, ken ti agtawen 52 a residente ti barangay Manalpac ti nasao met laeng nga ili.
Adda ti tallo nga indibidual ti nakataray no sadinno ti maysa kadagitoy ket nabigbig ken daytoy ket addaan ti umno a tawen a residente iti Barangay Lipay idinto a dagiti dua ket John Does.
Nakumpiskar dagiti otoridad ti maysa a set ti baraha, uppat a monoblock a tugaw, lamisaan, pusta a nasurok 150 a pisos.
Iti agdama ket maisagsaganan ti kaso a panaglabsing iti Illegal gambling Law wenno ti Presidential Decree 1602 kontra kadagiti suspek.
Kabayatanna, nagballaag ni Damo a naiget ti panagmonitor da iti iligal nga aktibidad iti ili da.
