LAOAG CITY – Inpanamnama ni Atty. Alipio Castillio III, ti Provincial Supervisor iti Commission on Elections ditoy probinsia a napinpintas ti plastar iti eleksion inton 2025.
Kunana nga ar-aramiden amin ti opisinada tapno mapasayaat iti plastar ti eleksion ken maipadanon iti napintas a serbisio publiko kadagiti umili.
Inlawlawagna nga uray saan nga election period ket nakasaganada a mangipaay ti tulong kadagiti agkasapulan nangruna kadagiti addaan ti problema iti panagrehistrona.
Innayonna nga inrugidan a napan nagbisita iti kada barangay tapno ad-adda a maiyasideg kadagiti residente iti panagparehistro kangrunaanna kadagiti senior citizens, persons with disabilities ken dadduma pay a saanna a kabaelan a mapan dumanon iti opisina iti Commission on Elections.
Kabayatanna, naammoan nga iti agdama ket umabot iti nasurok-kumurang tallo ribu nga indibidual ti baro a napan nagparehistro.
