LAOAG CITY – Inpakaammo ni Police Lieutenant Colonel Adrian Gayuchan, ti Hepe iti Philippine National Police iti siudad ti Batac a maibilang a maysa nga High Value Individual ti subject iti naisayangkat a search operation a ni Michael Bulalayao iti Brgy. 17, Tabug iti nasao a siudad.
Segun kenkuana, datin a natiliw ti suspek iti buy-bust operation idi tawen 2021.
Inbatadna a malaksid iti siudad ti Batac ket agop-operar pay iti paset iti ili ti San Nicolas ken ditoy siudad ti Laoag ti suspek.
Kunana nga adda ti naalada a 10 nga heat sealed transparent plastic sachet a naglaon ti maatap a shabu nga agbalor ti 10,200 a pisos.
Malaksid iti daytoy, inlawlawagna nga adda pay ti uppat a plastic bag a naglaon ti maipagarup a napagango a bulong ti marijuana nga aggatad ti 120 a ribu a pisos.
Kabayatanna, segun iti asawa ti suspek nga adda ti innem nga indibidual ti immun-unan a simrek iti pagtaenganda no sadino ket maipagarup a pinarusukanda ken binekkelda pay ti maysa kadagiti annakda banag a naiget a naglikudan dagiti otoridad.
