Inrakurak ni Provincial Fishery Officer Vanessa Dagdagan-Alimbuyuguen ti Ilocos Norte Bureau of Fisheries and Aquatic Resources (BFAR) a teknikal a tulong ti kangrunaan a kiddaw dagiti mangngalap ditoy probinsia.
Segun kenkuana, dagitoy a tulong ket tapno mapasayaat ken mapapigsa pay ti industriya ti panagkalap ditoy probinsia.
Dagitoy a tulong ket ti panagkiddaw da ti ramit kas ti environmental-friendly a fishing gears para iti nasaysayaat ken nataltalged a wagas ti panagkalap.
Gapu iti daytoy, kalikagom da ti agtultuloy a panangipaay kadagiti nasao a ramit tapno mapapigsa ken mapasayaat ti kinatalged dagiti mangngalap.
Kabayatanna, kuna ni Alimbuyugen a malaksid kadagiti kiddaw da a ramit ket adda met dagiti idiaya da a seminars para kadagiti mangngalap.
Daytoy ket gapu ta kalikagom da a maipaayan ti naan-anay nga ammo dagiti mangngalap, mapapigsa ti komunikasion, ken serbisio da.
Malaksid iti daytoy, innayonna nga adda pay dagiti programa ti Bureau of Fisheries and Aquatic Resources (BFAR) a pakairamanan kadagitoy ket dagiti agdama a programa kas iti fuel subsidy, ken ti programa ti scholarship para kadagiti annak dagiti mangngalap.
Naamoan a kalepleppas laeng ti fisheries scholarship program selection nationwide qualifying examination no sadinno nga adda agarup 68 a nageksamen manipod ditoy probinsia ken namnamaenda nga adda ti maala wenno makapasa iti daytoy.
