LAOAG CITY – Inlawlawag ni Brgy. Chairwoman Mrs. Lillia Tabucao, ti Brgy. Pangil iti ili ti Currimao a saanda nga agsingir ti bayad ti ticket no awanen ti maitedda a ticket kadagiti agpasiar iti nasao a lugar.
Inbatadna nga agbalor ti 20 a pisos ti ticket a bayadan dagiti sumrek iti maibilang kas maysa kadagiti tourist destination iti ili ti Currimao.
Kunana nga aggapu dagiti ticket iti munisipio isu a daytoy laeng ti pakalasinan a valid ti maysa a ticket.
Inlawlawagna nga adda ti aldaw a maubusanda ti ticket ngem saanda nga ipalubos nga agsingir dagitoyen kadagiti bisita wenno turista.
Mainaig iti daytoy, kunana nga adda ti dua a barangay tanod nga inaldaw a naka-deploy iti nasao a pagpasiaran.
Innayonna a dagiti amin a masingirda ket mait-ited iti lokal a gobierno iti ili ti Currimao.
Immuna iti daytoy, adda ti naawat nga impormasion ti Bombo Radyo Laoag a maipagarup nga agsingsingir dagiti barangay officials ti entrance fee nga awan ti mait-ited a ticket kadagiti maseknan nga umili.
