LAOAG CITY – Umaboten iti nasurok a 1.7 million a tattao ti naapektaran ti El Niño phenomenon iti pagilian.
Segun ken ni Department of Social Welfare and Development (DSWD) spokesperson and Assistant Secretary for Legislative Affairs Irene Dumlao, dagiti apektado nga indibidwal ket manipod iti Region 2, 3, Mimaropa, 5, 6, 7, 9, 12 ken iti Cordillera Administrative Region.
Iti baet daytoy, inrakurak ni Dumlao nga awan pay dagiti indibidual a naibakwit gapu iti nasao a weather condition.
Inpakaammo ti Department of Social Welfare and Development a kas tulong kadagiti pamilya nga agpaspasar ti panagkurkurang ti taraon gapu iti nakaro a tikag ket nagibunong da ti food packs nga agbalor ti 58-milyon a pisos, pakairamanan ti tulong pinansyal.
Malaksid iti humanitarian response action, adda pay ti proactive intervention ti Department of Social Welfare and Development kas ti Project Lawa at Binhi tapno maaddaan ti access iti danom dagiti apektado a komunidad gapu iti El Nino tapno malabanan ti panagbisin ken ipababa ti economic vulnerabilities dagitoy.
Naamoan a dagiti benepisyaryo dagiti nasao a proyekto ket maipaayan ti temporaryo a pamastrekan iti babaen ti cash for training ken cash for work.
Kabayatanna, adda pay ti Assistance to Individuals in Crisis Situation (AICS) Program ti ahensiya kas nayun a suporta kadagiti apektado ti nasao a weather phenomenon.
