Inbatad ni Fire Senior Inspector Edison Reyes, ti firemarshall ti Bureau of Fire Protection ditoy siudad ti Laoag, a manarimaan pay laeng ti pannakaimbestigar ti napasamak nga uram a nakapukawan ti pagtaengan ti 6 a pamilia.
Segun kenkuana, adda ti 4 a pagtaengan ti nadadael ken 6 a pamilya ti naapektaran.
Mainaig iti daytoy, kunana a rumrumuar a rason ti uram ket ti naliwayan nga apoy ni Ms. Rosalina dela Cruz.
Basar iti imbestigasion da, agpaborek koma ti danom ni dela Cruz a pagparti na iti manok, idinto ta agaron daytoy ket kasapulanna ti apos isut gapona a nagturong daytoy iti karrubada tapno agdawat ti apoy babaen ti papel a bitbitna.
Apaman nga agturong daytoy iti pagtaenganna, saan na a napuotan a mabalin nga adda naregreg nga apoy manipud iti papel a bitbit na a ditoy nga in-inot ti panagkayamkam iti apoy.
Kabayatanna, inpakaammo ni Fire Senior Inspector Edison Reyes, ti firemarshall ti Bureau of Fire Protection ditoy ciudad ti Laoag, a dakkelen ti apoy idi makadanun da iti lugar rason nga alisto a naibos ti danom kadagiti firetruck da.
Kuna na nga alisto a agwaras ken nagramram ti apoy gapu ta naaramid a light materials ken kayo dagiti pagtaengan.
Gapu iti daytoy, nagpatulong da iti Bureau of Fire Protection iti ili ti Bacarra ken Sarrat, kasta pay ti fire truck ni Vice Mayor Rey Carlos Fariñas ken dagiti fire truck ti Philippine National Police ken Department of Public Safety.
Inpetteng na pay a naladaw ti pannakaireport iti opisina da ti napasamak nga uram.
Iti agdama, kunana a P500K ti inisial a balor ti nadadael ngem nupay kasta agtultuloy ti panangurayda kadagiti dadduma pay a listaan ti nadadael a ramit dagiti biktima.
Kabayatanna, nagpalagip manen ni Reyes a kitaen a nasayaat dagiti mabalin a pagtaudan ti uram kangrunaan ita nga Undas 2026, kunana a kasalupan a kitaen dagiti ramit wenno appliances tapno maliklikan ti uram ken nataltalged ti pagtaengan.
