LAOAG CITY – Dagus a nagturong dagiti sanitary officers iti Ekhikaia Seafood Restaurant iti Brgy. Nalbo ditoy ciudad ti Laoag kalpasan a naireklamo gapu iti maipagarop a nabangsit nga angot.
Daytoy ti inbatad ni Miss Lorelyn Ventura, ti akinbagi iti nasao a seafood restaurant.
Segun ken ni Ventura, iti panaginspeksyon dagiti sanitary officers ket awan met ti nakita da nga aniaman a banag wenno basura a mangitunda koma ti nabangsit nga angot a kas ti reklamo ti maysa kadagiti residente iti nadakamat a barangay.
Kuna na pay a nagturong da iti balay ti nagreklamo kadwa da dagiti opisyal ti barangay, ngem awan ti nakita da a nga aniaman a basura ti seafood restaurant a makaparnuay ti nabangsit nga angot.
Inlawlawag na a ti laeng nakita dagiti sanitary officers ken inrekomendar da a mapasayaat ken makaluban ket ti drainage canal a pagay-ayusan ti danom, idinto a ti kaadda ti sumagmamano a ngilaw a gagangay a mapaspasamak ket naibalakad ti panag-spray da tapno mabugaw dagitoy.
Inpasingked ni Ventura a tungpalen da amin dagiti inrekomendar dagiti sanitary officers nga aramiden da tapno ad-adda pay a pumintas ti operasyon da.
Mainaig iti daytoy, patien ni Ventura a dagiti mangirekreklamo iti seafood restaurant da ket kayat da laeng nga adda ti mapagsasaritaan aglalo iti social media.
Nupay kasta, inbalakad na a no adda ti agreklamo ken agpainterview ket siguradwen nga usto dagiti irakrakurak da ken saan a makaperdi iti sabali.
