Umabot iti innem a balay ti nauram iti sitio 6, Barangay 46, Nalbo ditoy ciudad ti Laoag.
Segun ken ni Barangay Chairman Ruben Roque, ti rumrumuar a ti nangrugyan ti apoy ket iti balay ni Ms. Rosalina dela Cruz.
Kuna na a mabalin a ti maysa a rason no apay nga alisto a dimmakkel ti apoy ket gapu ta daanen ti balay ni dela Cruz.
Inrakurak met ni Barangay Chairman a silulukat ti barangay hall da para kadagiti pamilya a napukawan ti balay tapno isu ti temporaryo a pagnaedan da.
Mainaig iti daytoy, inbatad ni Ms. Rosalina dela Cruz a kabayatan ti panagparti na ti manok ket nakigtot idi mariparna nga adda ti gimmil-ayab iti suli ti mapan iti bodega na.
Gapu iti daytoy, inyaban na ti kaanakan na tapno bilinen a mapanna kitaen no ania ti nakita na a naggil-ayab iti uneg ti pagtaengan na.
Innayon na nga awan ti ammo na a nakasindi a silaw wenno paggapwan ti apoy iti uneg ti balay na gapu ta ti met nagpaburekan na ti danom nga usaren na nga agparti ti manok ket ti dalikan iti ruwar.
Kabayatanna, inpakaammo ni Fire Senior Inspector Edison Reyes, ti firemarshall ti Bureau of Fire Protection ditoy ciudad ti Laoag, a dakkelen ti apoy idi makadanun da iti lugar rason nga alisto a naibos ti danom kadagiti firetruck da.
Kuna na nga alisto a agwaras ken nagramram ti apoy gapu ta naaramid a light materials ken kayo dagiti pagtaengan.
Gapu iti daytoy, nagpatulong da iti Bureau of Fire Protection iti ili ti Bacarra ken Sarrat, kasta pay ti fire truck ni Vice Mayor Rey Carlos Fariñas ken dagiti fire truck ti Philippine National Police ken Department of Public Safety.
Inpetteng na pay a naladaw ti pannakaireport iti opisina da ti napasamak nga uram.
Iti agdama, inbatad na a saanda pay a maibaga no ania ti nangitunda iti napasamak nga uram gapu ta agtultuloy paylaeng ti imbestigasyon da, ngem naestablisar dan ti balay a nangrugyan ti apoy.
Kabayatanna, nagturong met a dagus ni Mrs. Perlita Cabello, ti mangidadaulo iti City Social Welfare and Development ditoy ciudad ti Laoag iti nakapasamakan ti uram tapno mangipaay ti tulong para kadagiti naapektaran a pamilya kas kadagiti food items ken non-food item.
Awan met ti nadangran iti napasamak nga uram ngem adda ti pannakaputed paylaeng ti supplay ti kuryente iti lugar tapno maliklikan ti sabali manen nga insidente.
