LAOAG CITY – Naideklara iti babaen ti State of Calamity iti ili ti Solsona gapu iti nakaro nga epekto ti El Niño phenomenon.
Segun ken ni Mayor Joseph De Lara iti nasao nga ili, daytoy ket kalpasan a dumanonen iti 60 a porsiento a barangay iti ili ti Solsona ti naapektaran ti kinaawan ti pangalaan ti suplay ti danum pakairamanan iti Barangay Mariquet, Barangay Talugtog, Barangay Bubuos ken dadduma pay.
Inbatadna a naatsyananen ti karayan, waig ken bubon rason nga adu kadagiti residente ti makipilpila iti maisaysayangkat a water rationing.
Gapu iti daytoy, nagdesisionda nga ipan iti ili ti Solsona iti babaen ti State of Calamity tapno mausarda ti pundo a nailatang para iti calamity wenno emergency fund.
Inpalgakna a marigatan ti Bureau of Fire Protection iti ili ti Solsona ti pangalaanda ti danum para iti agtultuloy nga isaysayangkatda a water rationing iti lugar.
Mainaig iti daytoy, inpakaammo ni Senior Fire Officer 3 Venner Adina, ti Municipal Fire Marshal iti Bureau of Fire Protection iti ili ti Solsona, malaksid kadagiti residential areas ket agkapulan pay ti water rationing dagiti sumagmamano a pagadalan kas ti Talugtog National High School ken Solsona National High School pakairamanan dagiti nagduduma pay a pangopisinaan iti nadakamat nga ili.
Naammoan nga inaldaw ti panangrasionda kadagiti maseknan a barangay, pagadalan ken pangopisinaan babaen kadagiti dua a fire truck-da ken maysa a truck manipod iti Municipal Agriculture Office idinto a naka-standby met ti maysa pay a fire truck-da para iti emergency purposes.
