LAOAG CITY – Kiniddaw ni Vice Mayor Jonathan De Lara iti ili ti Solsona ken ni Governor Matthew Marcos-Manotoc ti pannakaiyuswat ti cloud seeding operation iti nadakamat nga ili.
Inpakaammo ni de Lara a kalpasan a pinatgan ti gobernador ti kiddaw na ket dagus da a nagtataripnong kadagiti maseknan nga ahensya ti gobierno kas iti Philippine Atmospheric, Geophysical and Astronomical Services Administration; Provincial Environment and Natural Resources Office (PENRO), Department of Agriculture, Special Action Force (SAF) ken dadduma pay.
Kuna ti bise mayor nga inlawlawag ti Engr. Cynthia Iglesia iti Philippine Atmospheric, Geophysical and Astronomical Services Administration (PAGASA) a possible a makaiyuswat da ti cloud seeding operation iti ili ti Solsona gapu ta adda ti seeable clouds iti dumaya a paset ti probinsya.
Nupay kasta, inpalgak ni Iglesia a basar iti forecast da ket adda dagiti panagkimkimat na a kangrunaan a mapasaran ket iti oras ti alas-onse ti bigat.
Malaksid iti daytoy, nakita pay iti forecast a napigsa ti panangguyod ti angin iti umamyanan a paset rason nga agdudua ni Iglesia a no ituloy ti cloud seeding operation ket iti laeng paset na ti Cagayan ti mabenepisyaran ti tudo.
Iti baet daytoy, kuna ni de Lara a nupay nalidem paylaeng a mangiyuswat da ti cloud seeding operation iti ili ti Solsona ket itultuloy da latta ti agsagana kangrunaan na ket ado dagiti dokumento a kasapulan para iti nasao nga addang.
Innayon na a karaman kadagiti nasken a maisumitir ket ti permit manipod iti Bureau of Soil and Water Management ken dadduma pay.
Mainaig iti daytoy, kuna ti bise mayor nga umabot iti 50 a sako nga asin dagitoy ket sag25 a kilo ti kasapulan para iti maisayangkat a cloud seeding operation.
