Ilunglungalong ni Senate Energy Committee Chairperson Erwin Tulfo ti pannakitinnulong iti United Arab Emirates (UAE) tapno mangipatakder ti strategic oil storage facility a manamanama a mangpapigsa iti suplay ti langis ti Pilipinas ken ti posible a mangipuesto iti pagilian kas regional oil hub.
Iti bilateral discussions idi Oktubre 29 iti Abu Dhabu, nakitaripnong ti delegasion ti Pilipinas, iti panangidaulo ni Tulfo, kadagiti mangibagbagi ti Abu Dhabi National Oil Company (ADNOC) tapno trataren ti plano a pasilidad.
Karaman iti delegasion da Philippine Ambassador to the UAE Alfonso Ver ken Special Envoy to the UAE for Trade and Investment Kathryna Yu-Pimentel.
Segun iti Senador, makatulong ti pannakaadda ti strategic oil hub tappno makissayan ti epekto ti pabaliw-baliw a presio ti langis kadagiti Pilipino, aglalo ta limitado ti akses ti pagilian kadagiti strategic oil storage facility.
Mainaig iti daytoy, inrakurak met ti partido ti UAE a nakasagana daytoy a makitinnulong, iti panangidaulo ni ADNOC Chairman Sultan Ahmed Al Jaber.
Iti agdama, agsupsuplay ti ADNOC ti mapatta-patta 40,000 a bariles ti langis iti kada aldaw iti Petron. Segun iti delegasion ti UAE, possible a mapalawa pay ti plano nga oil hub ti suplay ti langis iti Pilipinas.
Inpaganetget pay ti ADNOC nga idanon iti partido ti Pilipinas ti kontratana para iti oil storage facility tapno matingiting ti gobierno.
Target a maipatungpal ti proyekto iti maikadua a kwarter ti 2027, uray no nakadepende daytoy iti agbalin a katulagan iti lokasion, imprastraktura, komersial a kondision ken iskedyul ti implementasion.
Malaksid iti imbakan ti langis, gagem pay a palawaen ti kooperasion ti Pilipinas ken UAS iti suplay ti krudo, pagpuonan kadagiti refinery, fuel retail networks, renewable energy ken gas-to-power development.
Kabayatanna, segun ken ni Tulfo, saan pay a pinal dagiti detalye ti ad-adda a napalawa a pannakitinnulong iti enerhia, ngem nagkari daytoy nga ilungalongna dagiti sumaruno a panagtratar tapno maitungpal ti katulagan.
