LAOAG CITY – Nakairekord ti Bureau of Fire Protection iti nangato a bilang dagiti insidente ti uram iti nagduduma a paset ti Pilipinas iti umuna a kwarter ti 2024.
Daytoy ket kalpasan a nakairekord ti ahensya ti pakabuklan a 9,568 nga insidente ti uram iti pagilian sipud idi Enero 1 agingga iti Mayo 10 ti agdama a tawen.
Nangatngato daytoy iti 40% no ikumpara iti nasurok nga 6,815 a kaso a nairekord iti isu metlaeng a panawen idi 2023.
Segun iti Bureau of Fire Protection, ita a tawen ket nagresulta iti nasurok a 4.2 billion a balor dagiti nadadael a sanikua gapu kadagiti napasamak nga uram iti nagduduma a paset ti pagilian.
Malaksid iti daytoy ket umabot met iti pakabuklan a 165 a biktima ti pimmusay idinto nga agarop 496 a sabsabali dagiti nasugatan.
