Naglikudan ti Philippine National Police (PNP) ti panawagan nga agus-usar ti “shoot-to-kill” approach iti panangipatungpal ti warrant of arrest kontra ken ni Senador Ronald “Bato” Dela Rosa.
Segun ken ni PNP chief General Jose Melencio Nartatez Jr., responsibilidadda nga ipatungpal ti linteg ken saan nga agtignay iti labes ditoy.
Inpettengna a masapul a suroten ti amin nga operasion ti due process, human rights ken rule of law.
Daytoy ket kalpasan ti panagwaras ti peke a quote card iti social media nga agkuna nga agpanpanawagan ni Cagayan de Oro Rep. Lordan Suan ti “shoot-to-kill” kontra iti Senador. Naglikudan met daytoy ni Suan ken kunana nga awan ti aniaman nga inarakurakna.
Nupay kasta, inbilin ni Nartatez kadagiti police unit nga ituloy ti intelligence gathering ken monitoring tapno maamoan ti lokasion ni Dela Rosa, a sumangsango iti warrant of arrest mainaig iti kaso a crimes against humanity iti International Criminal Court ken adda naikeddeng a P50 million a gunguna para iti impormasion a mangiturong iti pannakaarestarna.
