LAOAG CITY – Kiniddaw ti Department of Agriculture (DA) kadagiti agpanpanday linteg a suportaran ti pannakaipangato iti P15 billion a pondo iti Rice Competitiveness Enhancement Fund (RCEF).
Inpetteng ni Agriculture spokesman ken Assistant Secretary Arnel de Mesa a ti paset ti pondo ket usaren iti irigasyon ken pangtulong kadagiti mannalon nga addaan ti saan a nangatngato ngem dua nga ektara iti taltalunen.
Iti agdama ket adda laeng iti P10 billion ti Rice Competitiveness Enhancement Fund iti babaen ti Rice Tariffication Law (RTL) nga agngudo ita a tawen.
Dakkel ti naitulong ti agdama a linteg para iti produksyon ti bagas no sadinno a ngimmato ti 7% ti performance ti rice sector.
Ti Rice Tariffication Law original version ket P10 billion
laeng iti kada tawen manipod iti makolkolektar a taripa ti Bureau of Customs (BOC) manipod iti imported rice ti mapmapan kadagiti mannalon.
Manipod iti nasao a gatad ket P5 billion ti nailatang para iti mechanization, P3 billion iti inbred seeds, P1 billion para iti pautang ken P1 billion iti panagsanay dagiti mannalon.
Nupay kasta, immunan a nagkari dagiti kongresista a kitaen da amin dagiti isyu mainaig iti pending bills tapno saanen a kasapulan nga adda ti maamendaran kadagiti napapateg a linteg a kas iti daytoy.
