LAOAG CITY – Natay ti maysa a mayoral candidate iti estado ti Guerrero idiay Mexico kalpasan a napaltugan, sumagmamano a lawas sakbay ti eleksyon.
Ni Alfredo Cabrera nga agpaidasig a para mayor iti ili ti Coyuca de Benítez ket pinaltugan ti maysa nga armado a lalaki bayat ti iyus-uswat da a campaign rally.
Basar iti Video footage, bayat ti pannakialamano ni Cabrera kadagiti supporters na ket immasideg kenkuana ti maysa a lalaki ken bigla na lattan a pinaltu-paltugan ti kandidato.
Umabot ti 15 a putok ti paltog ti nangngegan sakbay a nakita ti naan-anay a pannakaidasay ni Cabrera.
Agpapan ita ket saan pay a masinunuo ti motibo iti krimen.
Kabayatanna, kinondenar ni Xóchitl Gálvez, ti agpaidasig a para presidente iti centre-right opposition coalition ti pannakapapatay ni Cabrera.
Inpalgak ni Gálvez nga awan ti sarita a mabalin na a pangdiskribir iti marikrikna na kalpasan ti napasamak kenni Cabrera.
Naamoan nga addan ti nasurok a 20 a kandidato idiay Mexico ti napapatay ken ginasut dagiti mapangpangtaan.
