LAOAG CITY – Mangnamnama ni Finance Secretary Ralph Recto nga agbalin nga stable ken abot-kaya ti presio dagiti magatgatang gapu iti maal-ala a rebate dagiti farm truck.
Inyuswat ti Toll Regulatory Board a kabinnulig ti Department of Finance, Department of Transportation, Department of Agriculture ken dagiti toll road concessionaires Metro Pacific Tollways Corp. (MPTC) ken SMC Tollways ti Agri-Trucks Toll Rebate Program.
Iti babaen ti programa, dagiti akreditado a trucker ti Department of Agriculture ket makaawat ti rebate a katukad ti maipatpatungpal a toll hike manipod idi Hunio 2023, epektibo idi Hunio 1, 2024.
Ti rebate ket maipatungpal iti tallo a bulan ken mapagsasaritaan pay no maaddaan ti extension depende iti inflationary situation.
Mapattapatta a 200 agingga 300 a farm product-carrying trucks a dumaldalan kadagiti expressway ti mabenepisiaran daytoy.
