LAOAG CITY – Nagpalagip manen ti Department of Health (DOH) iti publiko nga awan pay ti napaneknekan nga epektibo nga agas iti sakit a dengue.
Inaramid daytoy ti Department of Health gapu iti agtultuloy a panagngato ti kaso ti dengue iti Pilipinas.
Inbatad ni Department of Health medical officer Dr. Kim Patrick Tejano a dagiti virus ket narigat a maaddaan ti antivirals.
Kuna ni Tejano nga agtultuloy ti panagadal kadagiti possible nga agas para iti dengue ngem agpapan ita ket awan pay ti maibilang nga epektibo nga agas para iti naso a sakit.
Kabayatanna, inpaganetget ni Tejano ti ballaag ti Department of Health iti panagusar ti alternative ken herbal treatments para iti dengue kas ti tawa-tawa, siling labuyo, ken bayawas.
Segun iti Department of Health, ti kapintasan a wagas tapno malabanan ti sakit ket iti babaen ti panangliklik kadagiti lamok a carrier iti dengue.
Inrekomendar pay ti ahensya ti panagsuot kadagiti atiddog a bado ken pantaloon wenno pajama ken agusar ti lotion ken spray a panglaban iti lamok.
Ginutigot pay ti Department of Health dagiti Pilipino a mapan agpakonsultar a nasapsapa iti doctor no agpasar kadagiti sintomas kas ti panaggurigor, panagsakit ti ulo ken susuop, panagbakwar ken adda dagiti litem ti bagi.
Innayon ni Tejano a ti tulbek iti panangliklik ken panangkontrol iti dengue ket ti nasapa a diagnosis.
