LAOAG CITY – Binigbig ni Bicol Saro Party-list Representative Brian Raymund Yamsuan ti kasapulan a maaddaan iti multisectoral strategy nga idauluan ti gobierno tapno agpatingga ti bisin ken food insecurity iti Southeast Asian region wenno ASEAN.
Daytoy ti mensahe ni Yamsuan bayat ti idadar-ay na iti Second Joint Workshop nga inorganisar ti ASEAN Inter-Parliamentary Assembly, United Nations Food and Agriculture Organization (FAO) ken ti International Institute for Sustainable Development (IISD).
Kunana a kas Committee Chair ti Aquaculture and Fisheries Resources, dakkel ti maitulong ti estratehia iti pannakabukel ti sustainable environment a mangtignay iti ekonomia ken pakagunggonaan dagiti umili.
Innayon ti mammanday-linteg a ti akem dagiti mammanday-linteg ket ti panangrisut iti bisin ken malnutrision a napateg iti pannakaipatungpal dagiti pagannurotan a nailanad iti ASEAN Guidelines on Promoting Responsible Investment in Food, Agriculture and Forestry (ASEAN-RAI).
Impaganetget pay ni Yamsuan ti kasapulan ti panagtitinnulong dagiti nagduduma a sektor nga idauluan ti gobierno tapno maipasdek ti corporate responsibility ken international cooperation dagiti kameng ti ASEAN.
