LAOAG CITY – Napaay ti Pinoy boxer a ni Dave Apolinario iti umuna a major world title fight-na.
Daytoy ket kalpasan a pinabagsak isuna ni Angel Ayala ti Mexico iti maikanem a round.
Naisayangkat ti flyweight fight dagiti dua iti Restaurante Arroyo idiay Mexico City.
Iti umuna a pannakabagsakna iti maikanem a round ket naaramidna pay laeng ti bumangon ngem idi maulit manen daytoyen ket inpasardengen ti referee ti laban.
Inpasiguradona a saan nga agsardeng ti panangilabanna kadagiti world title ken agtultuloy ti panagsanayna.
Gapu iti balligi ket addaanen ti 18-0 a panangabak ti Mexican boxer nga addaan ti walo a knockouts ken nagun-od ti bakante nga IBF belt.
Idinto ti agtawen iti 25 a ni Apolinario ket addaan ti 20 a panangabak ken maysa a pannakaabak nga addaan ti 14 a knockouts.
