LAOAG CITY – Inrakurak ni dati a tennis world number one at two-time Grand Slam winner Simona Halep ti panagretirona.
Inaramidna daytoy kalpasan ti pannakaabakna iti first round ti Transylvania Open kontra ken ni Lucia Bronzetti ng Italy.
Inbatad ti agtawen iti 33 a Romanian tennis star a saannan a kabaelan ti sugat iti tumeng ken abagana.
Agtipon a ragsak ken ladingit ti marikriknana gapu ta uray kayatna pay laeng ti agay-ayam ket saanen a kabaelan pay ti bagina gapu kadagiti injury-na.
Nagyaman daytoy gapu ta nagbalin a world number 1 isuna ken nakagun-od ti Grand Slam.
Napaay ti tallo a Grand Slam Finals ni Halep agingga a nagun-odna ti umuna a major iti French Open idi 2018 ken nagballigi ti Wimbledon iti simmaruno a tawen.
Idi Oktubre 2022 ket nasuspenso isuna gapu iti panagpositibona iti roxadustat a maysa a maipawil nga agas a mangpapigsa iti panagaramid ti red blood cells iti US Open.
Gapu iti insidente ket napatawan isuna ti uppat a tawen a ban agingga a nakissayan daytoy ket nagbalin a siam laengen a bulan kalpasan nga inaprobaranda ti apelana.
