LAOAG CITY – Napalaos ti panagyaman ni Dr. Virgilio Julius Manzano Jr. kalpasan nga isuna ti napili ti Mariano Marcos State University Board of Regents kas maikawalo a Presidente iti nasao nga unibersidad.
Inbatadna a naiget ti nagdalanna a proseso ngem mamati isuna a nagutigotna dagiti kaaduan a miembro ti MMSU Board of Regents a kabaelanna ti mangidaulo kas baro a Presidente ti unibersidad.
Inlawlawagna nga apaman a mangrugi daytoy nga agserbi kas Presidente ket itultuloyna ti Succeed Agenda iti napalabas nga administrasion ti MMSU ngem ad-adda pay a padur-asenna.
Kunana a pinadasna a nagaplikar kas Presidente iti Pampanga State Agricultural University gapu ta nagtrabaho isuna ditoy iti uneg ti sangapulo a tawen ngem napaay daytoy.
Maipalagip a nakagun-od ti unanimous decision ni Manzano manipud iti MMSU Board of Regents.
Naammoan nga agserbi pay laeng isuna kas OIC-President agingga inton Hulio 31, 2025, ti unexpired term ti dati nga MMSU President a ni Dr. Shirley Agrupis nga itan ket Commission on Higher Education Commissioner.
Kabayatanna, ti terminona kas University President ket opisial a mangrugi inton Agosto 1, 2025.
