LAOAG CITY – Bwineltaan ni US President Donald Trump ni Ukrainian President Volodymyr Zelensky gapu iti nagbalin a rakurak na a nasurpresa gapu ta saan a naimbitaran ti pagilian da iti naiyuswat a taripnong idiay Saudi Arabia.
Karaman kadagiti pagilian a nagatendar iti taripnong ket ti Estados Unidos, Russia ken Saudi Arabia.
Gagem ti naiyuswat a taripnong ket tapno agngudon ti mapaspasamak a riribok iti nagbaetan ti Ukraine ken Russia.
Inpetteng ni Trump a nadismaya iti nagbalin a reaksyon ni Ukrainian President Zelensky.
Kagiddan iti daytoy, pinabasol pay ti US President ti Ukraine iti panangrugi ti gubat ken inpalgak na a ti nadakamat a pagilian ket mabalin koma a nagaramid ti katulagan a nasapsapa.
Maipalagip a ti naan-anay a panangraot ti Russia ti Ukraine ti nangrubrub iti gubat, addan agarop tallo a tawenen ti napalabas.
