LAOAG CITY – Napadayawan ti Barangay 23 San Matias ditoy siudad ti Laoag kas Search for Cleanest, Greenest, Safest & Model Barangay on Eco-Waste Management of Laoag City para iti tawen 2024.
Segun ken ni Barangay Chairman Jay Ramos, ti Barangay 23 ditoy siudad ti Laoag, dakkel a pannubok kadakuada ti panangipatungpal ti zero waste management nangruna ket dakkel ti barangayda ken adda pay ti uppat a rural areas iti lugarda.
Inbatadna a naiget ti panangipatungpalda ti waste segregation iti uneg ti barangayda no sadinno a kinasapulanda ti naan-anay a panawen tapno maallukoy dagiti residente.
Inlawlawagna a tunggal Sektor Kagawad iti barangayda ket mapanda ipabasa ti linaon ti ordinansa seknan iti waste segregation tapno ad-adda a maipakaammo kadakuada ti rumbeng nga aramidenda.
Babaen iti daytoy, kunana a naipasagepsep kadagiti kabarangayanna a saanda nga alaen wenno kolektaren dagiti basurada no saan a na-segregate dagitoy iti biodegradable, non-biodegradable ken recyclable.
Mainaig iti daytoy, nakaawat ti Barangay 23 San Matias ditoy siudad ti Laoag ti 75 a ribu a pisos kas premio para iti Search for Cleanest, Greenest, Safest & Model Barangay on Eco-Waste Management of Laoag City idinto a 25 a ribu a pisos met para iti Most Effective Material Recovery Facility.
Kabayatanna, inpasingked ni Kapitan Ramos a ti naawatda a premio ket mausar para iti pannakapasayaat pay ti waste segregation, pannakapapintas ti eco park ken vegetable garden pakairamanan ti panangnayon kadagiti street lights ti barangayda.
Naammoan a daytoy ti maikadua a daras a nagsaruno a nangabak ti nasao a barangay para iti Search for Cleanest, Greenest, Safest & Model Barangay on Eco-Waste Management of Laoag City.
