LAOAG CITY – Mangipaay ti dua a rescue boat ti Japanese Government ditoy probinsia.
Segun ken ni Japanese Ambassador to the Philippines Endo Kazuya, kalikagumda a matulungan dagiti nagduduma a probinsia ditoy pagilian pakairamanan ditoy Ilocos Norte maipapan iti disaster rescue.
Inlawlawagna nga idi pay laeng koma napalabas a tawen nga umay bumisita ditoy probinsia ngem gapu kadagiti dimmuprak a bagyo ket saan daytoy a natuloy.
Inbatadna a naobserbaranna pay a no adda dagiti didigra ditoy probinsia kangrunaanna ti bagyo ket napigsa ti epektona.
Naammoan nga inawat ni Gov. Matthew Marcos Manotoc ti $60,711 wenno katukad ti P3,500,000 tapno mapundoan ti proyekto a napauloan ti “The Project for the Provision of Rescue Boats for Disaster Relief in Laoag City and Its Vicinity, Ilocos Norte.”
Maipalagip nga iti napalabas a tawen 2024 ket nagsasaruno dagiti dimmuprak a bagyo ditoy probinsia no sadinno sumagmamano kadagitoy ket nagbalin pay a Super Typhoon.
Immuna iti daytoy, pormal a nagpinnirma ni Gov. Matthew Marcos Manotoc ken ni Japanese Ambassador to the Philippines Endo Kazuya ti Memorandum of Understanding mainaig iti tulong nga ipaay ti nasao a gobierno babaen ti Grant Assistance for Grassroots Human Security Projects (GGP) tapno mapundoan ti pannakapatibker ti disaster preparedness ken rescue ditoy probinsia.
