LAOAG CITY – Nakita iti maysa a panagadal a mangitunda iti nalabes a kinalukmeg a maysa a kita ti malnutrision ti nalabes a panagtutok dagiti agtutubo iti panagusar kadagiti gadget.
Basar iti datos manipud iti Department of Science and Technology-Food and Nutrition Research Institute (DOST-FNRI) nga idi 2022, 16.1 a porsiento kadagiti ubbing nga agtawen iti 6 agingga iti 12 ti nalabes ti timbangda ken nalukmeg.
Naammoan nga 11.7 a porsiento kadagiti agtutubo nga agtawen ti 13 agingga iti 19 ken 44.4 a porsiento kadagiti nataengan nga agtawen ti 20 agingga iti 59 ti addaan iti isu met laeng a kasasaad.
Inbatad ni Dr. Michelle Sy iti Child Neurology Society of the Philippines a ti adu unay nga screen time ket mabalin a pakaigapuan ti naginad a panagdakkel ti utek.
Ti napaot a panangusar iti oras ti screen nga addaan iti napaspas unay a panagbalbaliw ti screen wenno panagbalbaliw ti ladawan ti mangisuro iti utek a mangnamnama iti nangatngato a lebel ti pannakatignay ken mangiturong iti kinaawan atension.
Paidamanna pay dagiti ubbing kadagiti padas a kasapulanda nga adalen para iti umno a panagdakkel ti utek.
Kabayatanna, inladawan ni Dr. Cynthia Cuayo-Juico, pediatrician ken fellow ti Philippine Pediatric Society, ti agdama a kasasaad a “super alarming” gapu ta nagbalinen a sadot ken saan nga aktibo dagiti ubbing. Naapektaran pay ti social skills-da gapu ta agpannurayda iti teknolohia.
