LAOAG CITY – Kinumpirmaran ti Department of the Interior and Local Government ditoy siudad ti Laoag nga adda dagiti Sangguniang Kabataan officials ditoy siudad ti nagikkat iti puesto.
Segun ken ni Ms. Charis Garma, ti mangidadaulo iti nasao nga opisina, daytoy ket kalpasan nga adda dagiti nag-resign ngem saanna pay a nakita ti istatistika no kasano ti kaadu ti naglusulosen kadagitoy.
Inlawlawagna a ti kangrunaan a rason dagiti nagikkat iti puesto ket gapu ta naaddaan dagitoyen ti trabaho.
Inbatadna a no maipanggep iti daytoy a banag ket saan met a mabalin nga igawid isuda tapno agtalinaed iti puesto gapu ta karbenganda ti agikkat no saandan a kayat ti agserbi kas SK official.
Kunana nga iti agdama ket manarimaanen ti panangur-urayda da ti advisory ti Department of the Interior and Local Government – Head Office no ania dagiti nasken nga aramidenda kadagiti posision a nabakantian.
Kabayatanna, inpanamnama ni Garma a no adda man dagiti Sangguniang Kabataan officials a nagikkat ket saan met a naapektaran ti trabahoda kadagiti barangay ditoy siudad ti Laoag.
