LAOAG CITY – Natay ti tallo a baboy a taraken ti maysa a residente iti Barangay Parparoroc iti ili ti Vintar gapu ta maipagarup a nagpositibo dagitoy iti African Swine Fever wenno ASF virus.
Segun ken ni Mrs. Reynalyn Pagarang ti Barangay Parparoroc iti ili ti Vintar, immuna a natay ti umuna a baboyna idi Disiembre 6, 2024, ti maikadua ket idi Disiembre 8 idinto a Disiembre 14 a natay ti maikatlo a baboyna.
Inbatadna nga idi immuna a natay ti baboyna ket saanna nga insigida nga in-report gapu ta mamati isuna a gagangay laeng a sakit ti nangitunda ti pannakatayna.
Nupay kasta, inlawlawagna nga idi natay ti maikadua a baboyna ket ditoyen a nagdesision isuna nga i-report kadagiti barangay officials seknan iti daytoy a pasamak.
Kunana a Disiembre 12, 2024 idi napanna inpakaammo daytoy a banag iti Barangay Chairman ken sumagmamano a Barangay Kagawad iti barangayda.
Mainaig iti daytoy, inpettengna a ti nagbalin a sungbat dagiti barangay officials kenkuana ket saanen a daytoy nga i-report gapu ta suktanda laengen dagiti natay a tarakenna a baboy.
Gapu iti daytoy, inpakaammona a saanna metten nga indanon iti Municipal Agriculture Office wenno Municipal Veterinary Office gapu ta ninamnamana a masuktan dagiti baboy babaen kadagiti opisial ti barangay a nagkari kenkuana.
Kabayatanna, pinadas ti Bombo Radyo Laoag News Team nga alaen ti takder dagiti maseknan a barangay officials ngem nagkedked dagitoyen a mangipaay ti naan-anay a komento.
