LAOAG CITY – Opisialen nga inparuk-at ti ili ti Vintar nga idadauloan ni Municipality Mayor Richard Degala ti pesio ti liveweight ti baboy, a pakairamanan dagiti pagalagadan ti panaglako, pannaka-biahe manipud ti barangay agingga iti slaughterhouse.
Segun ken ni Mayor Degala, namunganay daytoy iti panagturong ti Presidente ti hog raisers iti ili ti Vina kenkuana tapno ipadanon dagiti arungaing dagiti agtartaraken ti baboy.
Dagus met a nangiyuswat da ti panagtataripnong tapno ammoen, kitaen, ken adalen dagiti addang a maaramid no apay adda dagiti kakastoy a mapaspasaran dagiti agtartaraken ti baboy.
Ti nasao a taripnong ket inatendaran ti Price Monitoring team, dagiti gunglo ti hog raisers, ken nagduduma nga ahensia nga adda pakainaiganna iti nasao a problema.
Naamoan nga adda ti immun-una a presio ti liveweight ti baboy ngem saan a masursurot no sadinno nga adda dagiti sumagmamano a problema a nakita ti Mayor.
Pakairamanan kadagiti problema ket no addan ti mapasaran ti hog raisers a problema ti kuarta ket ditoy nga idiaya da ti nababa a presio tapno masupusupan ti kasapulanda nga agtartaraken, maikadua ket ti saan a nasayaat a pannakaimplementar ti immun-unan nga Executive Order, ken ti kasapulan a panangadal dagiti hog raisers ti umno a paniempo ti panagtaraken ti baboy.
Malaksid iti daytoy, kuna ti Mayor nga adda ti mangmanmanipula ti presio no sadinno a bimmaba agingga P130, P135 ken P140.
Masdaaw ti Mayor no apay bimmaba iti kastoy a presio idinto a P160 ti Executive Order a naipulog.
Iti agdama, iti babaen ti naiparuk-at a kilo ti baboy a no;
100 kilos agpangato ket P180;
90-99 kilos ket P175;
80-89 kilos ket P170;
79 kilos ken agpababa ket P165;
120 kilos agpangato wenno overweight ket P175; ken iti
Takong ket P100.
Kabayatanna, kunana a no siasinnoman nga aglabsing iti pannakaimplementar iti nasao nga Executive Order ket maipaayan ti show cause order ken ti possible a pannakaipili ti kaso a sangoenda.
