LAOAG CITY – Nakaruaren iti pagbalodan ti dua a suspek gapu iti panagsipdotda ti alahas kabayatan ti panagfiesta iti ili ti Sarrat.
Segun ken ni P/Capt. Kester Arellano, Hepe ti Sarrat Municipal Police Station, daytoy ket kalpasan a nakipag-areglo dagiti biktima kadagiti suspek.
Inbatadna nga immunan a naipila ti kaso idi Sabado ti 2 counts ti kaso a Theft kontra kadagiti suspek.
Nupay kasta, nagdesision dagiti biktima a makiareglo babaen ti pannakaisubli dagiti alahas ken agbayad iti gatad a napagtutulagan dagitoy.
Kunana a saan metten a naidetalye dagiti biktima no mano ti napagsasaritaanda a bayadan dagiti suspek.
Gapu iti daytoy, insigida met a nangiparuk-at ti release order ti Korte ken napalubosan a rummuaren iti pagbalodan dagiti dua a suspek.
Maipalagip a dagiti biktima iti nasao nga insidente ket agtawen ti 67 ken 65 nga agpada dagitoy a residente iti ili ti Sarrat idinto a dagiti suspek ket isuda Estrella Basuil y Sinco, agtawen ti 75, naasawaan, awanan ti trabaho, residente iti Barangay Pug-os, Sinait, Ilocos Sur ken ni Ronalyn Tinasa y Ibatuan, agtawen ti 51, naasawaan ken residente met iti Barangay Pambaran iti ili ti Paoay.
Immuna iti daytoy, inipit-ipit dagiti suspek dagiti biktima ken bulonda metten a rinabsot dagiti kwentasda nga agbalor ti 35 a ribu a pisos ken 28 a ribu a pisos nga agpada a nagatang dagitoy iti ballasiw taaw.
