LAOAG CITY – Agamak dagiti residente idiay Estados Unidos gapu iti panangipatungpal ni President Donald Trump ti nangatngato a taripa dagiti produkto nga aggapo iti sabali a pagilian kangrunaan na iti China, Mexico ken Canada.
Iti report ni Bombo International News Correspondent Rene Ballenas iti Estados Unidos, agamak da a gapu iti panagngato ti taripa dagiti produkto manipod kadagiti nadakamat a pagilian ket kayatna a sawen ngumato met ti paggastosan da iti sibubukel a tawen.
Kuna na nga iti agdama ket saanda pay a marikna ti epekto daytoy ngem mamati a kadagiti masungsungad nga aldaw ket marikna danton aglalo no agturong da kadagiti grocery stores.
Inbatad pay ni Ballena a pagam-amkan da pay a no agtultuloy ti trade war iti nagbaetan ti Amerika ken dagiti dadduma a pagilian ket isuda laeng a mismo a gagangay nga umili ti kangrunaan a maapektaran.
Inpalagip ni Ballena a no bilang isardeng dagiti nadakamat pagilyan ti agimports kadagiti produkto da iti Estados Unidos ket sigurado a maibusan da ti stock ken possible nga agtungpal iti panagbisin ti ado nga Americano.
Innayon ni Ballenas a dagiti produkto mismo ti Amerika ket nangingina ti presyo na no ikompara kadagiti aggapo iti sabali a pagilian isut gapuna a dakkel ti epekto na kadagiti umili no agtultuloy ti nangato a taripa dagiti produkto.
Inpetteng ni Ballenas a saan nga umdas dagiti bukod a produkto ti Amerika kangrunaan na ti taraon para iti amin nga Amerikano isut gapuna a kasapulan da ti ag-export iti sabali a pagilian.
